الفصل السابع

هيتقال عليا هبله بس حاجة زعلتني بجد النهاردة .. لما شاب كويس وبيشتغل رسام ومعاه لوحة جميلة بجد جداااا وكل ما يروح لجاليري عشان يبيع اللوحة بتاعته يقولوا مش عايزين بجد منظره وهو مقهوور زعلني اوووي لدرجة اني لو اقدر اشتريها انا كنت اشتريتها
ليه بنحب نذل الناس ونقهرهم طب حتى قولوا لأ بطريقة احسن من كده هو ده ذنبه انه بيكافح وبيشتغل؟؟؟؟؟؟

بجد اللي بيحصل ده غباء .. بغض النظر عن الناس اللي هتقولي الثورة هتغير والخ .. انا عارفه انها هتغير ان شاء الله بس بعد وقت طوييل
لان الناس مش هتتغير من يوم وليلة بس انا اللي مزعلني ايه اللي عمل الناس كده من الاساس ،، ليه بنحب نحبط اي حد اودامنا ونحسسه انه فاشل

محدش في المحلات دي كلف خطره وبص ولو نظره سريعه ع اللوحة .. طب قوله انك مش محتاج قولهاله بطريقة فيها ذوق

بس احنا وصلنا اننا بنحكم ع الناس من المظاهر الخارجيه بس

خلاص حكمت عليه انه فاشل من غير ما تبص

انا تعبت من الناس دي بجد .. لان انا نفسي بعاني منهم

مجتمع ضيع مجهودي وتعبي وحكم عليا ان مستقبلي يضيع واعيش في مكان مش مكاني

بس استفدت اني اكتشفت حاجة جوايا وبتمنى اني اكون صحفيه او كاتبه

احلااااااااااام بقا

لاني للاسف كنت من الناس اللي بيحلموا انهم يدخلوا كليات القمة لمجرد دخولها وخلاص

مش مهم انك تدخل كليه كبيرة او مشهورة والناس يقولوا المهندس جه او الدكتور راح

المهم تعمل اللي انت بتحبه وعايز تعمله

مش اللي بيطلبه منك اهلك او المجتمع .. هو خلاص البلد كلها هتبقا دكاتره و مهندسين

يالهووووي ليييه يعني

انا لا احمل ضغينه لاي حد منهم بالعكس انا كان نفسي ابقا مهندسه في يوم

بس الحمدلله اكتشفت اني بحب اكتب اووووي حتى لو كتاباتي دي محدش هيقراها مش مهم المهم اني اطلع اللي جوايا

اعمل حاجة انا عايزة اعملها وبحب اعملها وبحس بسعادة وقتها لما اعمل الحاجة دي

بجد لاي انسان احبط اخوه الانسان في مرة احبك اقولك حاجة

في علم النفس والاجتماع في حاجة اسمها الوصمة الاجتماعيه : وهي عبااره عن لما المجتمع يوصف شخص بانه مثلا مجرم وهو مش مجرم

ألشخص ده يتحول لمجرم بسبب المجتمع ده

بجد انت ممكن تدمر شخص والشخص ده يدمر غيره كتيييييير

ممكن بكلمة تجرحه يخليه مثلا ينهي حياته .. وعلى فكره هتتحسب انك قتلته - دي فتوى من وجهة نظري - بس مش شرط ان الانسان ينهي حياته بالموت

بالعكس ممكن ينهي حياته بالمبالاة وانه يكون يائس من اي حاجة ويرفض انه يشتغل او يتعب

لانه شايف انه كده كده ولا حاجة

وللاسف انا في الحاله دي فعلا

فكر قبل كل تصرف .. الدنيا بتتغير اهو خلاص

ليه احنا اللي مش عايزين نتغير ..

وكل واحد حس باحباط مرة مش عايزاه يزعل او يضايق

ومن حقك ان تعترض على اي حد يحبطك لانه مش من حقه يحبطك

وعلى فكره سياسة الدولة المخلوعه كانت كده

محدش يقنعني انك المصريين مكانوش محبطيين

كلنا كان عندنا احبااط ويأس ان مفيش حاجة هتتغير واننا هنعيش ونموت ومبارك قاعد على قلبنا ومربع

بس كسرنا حاجز اليأس والاحباط

عشان كده هقول للمرة الملييوون نصيحتين

* بلاش تحبط غيرك .. تقدر تنصح وبطريقة واسلوب كويس بس بلاش تدمر انسان مالوش ذنب

* ولو انسان في يوم احبطك عاوزاك تثق في نفسك واوعا تسلم نفسك لليأس عشان هيقتلك وهتعيش بجسمك ع الارض
وروحك هتكون اتسحبت منك وضاعت وهتفقد القدرة على انك تشوف الكون الا بنظرة واحدة كلها تشاؤوم

الفصل السادس

موضوع الحب مش مسيطر على دماغي .. بس بشوف حواليا مواقف تشل وتجيب الضغط ومواقف تفرح ومواقف تحزن عن الحبيبة اللي شوفتهم في حياتي

بس المرة دي انا هوريكوا شوية مواقف حصلت معايا او مع غيري او سمعتها من حد او من وحي الخيال .. مش ده المهم .. المهم انها بتحصل في الدنياا دي فعلا

الموقف الاول::/

بنت : انا حبيبي ده احسن حاجة في حياتي انا عمري ما هلاقي زيه ابدا ومستنيه بفارغ الصبر اليوم اللي هنجوز فيه وانا هستناه لاخر العمر

وبعد مرور اسبووووووع

هتعملي ايه في العريس اللي عنده شقه و بيشتغل في بنك اللي شكله مش احلى من حبيبك

بنت: انا مستحيييل اوافق انتي بتفكري في ايه اصلا مين ده اللي هجوزه هو انا معقولة اسيب حبيبي
وبعد مرور كااام يوم ونسمع خبر موافقة البنت دي على العريس

ايه ده انتي وافقتي عليه ليه؟؟؟

بنت : بصي هو انا كلمت البني ادم اللي كنت بحبه وشرحتله الظروف والموقف وقولتله اتصرف انا جالي عريس واهلي موافقين عليه .. هو قالي ظروفي ومش ظروفي وهعمل ايه دلوقتي حسيت انه بيتلكك سيبته
وبعدين العريس ده شكله بيني وبينك طيب وابن حلال كده عاادي بقا


ايه جماعه عادي هو كلمت الواد واتصلت بيه تررن تررن وانا جالي عريس اتصرف .. المفروض الواد ده يجيب شنطة الدولارات و وعقد الفيلا اللي في الدرج ويجي لاهلها وانا عاوز اجوز بنت حضراتكم

ما هو مكانش في اتفاق انها تستناه ما مش هي اللي قالتله كده ده كان خيالها وتعاطفها ... وتعاطفك وحده مو كفايه



الموقف الثاني :/

ولد بيكلم اول واحده حبها : انتي اول واحدة انا حبيتها ولو كان في اعجاب كده ولا كده لاي بنت ف كان ده لعب عيال وهجص انا عمري ما هسيبك

تمر سنه او كام شهر و نفس الولد بس مع بنت تانيه

الولد : حبيبتي انت بجد الانسانه اللي بدور عليها واي حب كان قبلك ده كان هجص ولعب عيال انتي اللي بحبها بجد ومش هقدر اسيبك بوعدك

ااااااااه وتمر سنه وكام شهر وشوف حكمة ربك يا مؤمن نفس الولد هو بشحمه ولحمه بس بقا مع واحدة تااااااااااالته خاااالص

الولد : حبيبتي انتي بجد الانسانه اللي بدور عليها وكل اللي فاتوا دول كانوا هجص ولعب عيال انا كنت قبل انسان طايش ومستهتر معاكي حسيت اني اتغيرت وبقيت انسان تااني خالص بيبدأ من جديد انا مستحيل اسيبك

ااااه يا دماااغي .. طبعا اللي فات ده بيحصل ونفس الوعد بتاع انا مش هسيبك ويسيبها

طب ليه سابها يا ترى؟؟ .. يا اما عشان زهق منها .. او شاف واحدة غيرها احلى واحسن .. او عشان كل واحدة فاتت يكتشف مع الوقت انه محبهاش وعلى اساس ان البنات عنده فئران تجارب يجرب طب ممكن احب دي لالالا طب دي احبها لالا طلعت مش بحبها طب مين يا ترى اللي هحبها

يا اما بيتجرح بس مفيش حد بيتجرح كل المرات دي .. ايه هو اهبل؟؟؟ .. مفيش ولد اهبل الايام دي

صدقني الحب بيجي لوحده مش احنا اللي بندور عليه ومينفعش نجرب الحب في بنات الناس يمكن يليق عليها حبي ولا لأ

الموقف الثالت:/

بنت : انا مضايقة اني سألت على حبيبي الاولاني انا ايه خلاني اعمل كده وهو شكله بيستعبط وعايز يرجع وانا كان المفروض اقوله اني ارتبطت بس نسيت ..انا حبيبي الاولاني نسيته خلاص وانا ربنا يخلي ليا حبيبي التاني ابن الناس الاغنيا يتمنالي الرضا ارضى وعايز يخليني مبسوطة وسعيدة دايما .. وانا قررت مغلطتش زي الاول واخد اللي بحبه اكتر وهو يكون بيحبني بس مش اد حبه ليا .. انا خدت اللي بيحبني بغض النظر عن اني بحبه ولا لأ بس هو ولد لذيذ يعني .. بس ساعات بحس اني بحن لحبيبي الاولاني مش عارفه ليه

طب خلاص سيبي الجديد وارجعي للقديم

البنت : لالالالالا مستحيل خليه متعلق كده

يعني هتسيبي الاتنين يحبوكي وتعلقيهم؟؟؟؟

البنت : وانا اعملهم ايه يعني

!!!!!!!!  طيب 

البنت : اه صح نسيت اقولك مش مستر محمد بتاع الرياضة اللي مجوز ومخلف طلع بيحبني هههههههههه

ده يبقا راجل فاضي ومش محترم

البنت : اه ما انا مش عارفه اعمل معاه ايه

مش عارفه ايه ازاي انتي لاازم مش تعبريه تاني

البنت : ليه يعني حراام

حرام ايه بس؟؟؟ .. انتي ازاي هتكلميه يا بنتي وهو كده ولا انتي بتحبيه ولا ايه

البنت : بصراحة انا معجبه بيه

!!!!!!!!!!!!!!!!!!!!!!!!!!!!!!! الشتيمه حراااااام

ودي حاله اسمها تعدد الحبيبه .. في ناس ولاد او بنات عندهم المرض ده .. حب انهم يكونوا بيتحبوا و الناس بتجري وراهم عشان كلمه او نظره وده مرض وحش اووي وربنا يكفينا شره .. بس دول في نظري مرضى نفسيين انيل مني بكتييير لانهم عمرهم ما حبوا بجد ولانهم عندهم حب امتلاك لاي جنس اخر لازم يحبهم وخلاص حتى لو هما مش بيحبوه .. اللي بيحب بجد مش بيشوف غير حبيبه وبس

الموقف الرابع:/

الولد : حبيبتي على فكره انا حكيت لماما ولبابا عليكي وهما نفسهم يشوفوكي بجد ويتعرفوا عليكي وعلى مامتك انا صممت انهم يكونوا عارفين عشان انا بحبك بجد والحب احساس مش عيب ولا غلط الحب احساس نبيل ومش عيب انه يكون في النور وبعدين الحب نهايته الجواز وهما كده كده كانوا هيعرفوا

ايه ده الله اكبر ايه الواد الجامد ده والكلام الحلو ده ..انسان زي الفل بس لما يعدي كاااام شهر

هنلاقي ان نفس الولد ده طلع مش محترم وبيعرف خمسين بنت غيرها علاقه محترمه او غير محترمه معاهم وان دي مش اول بنت يقدمها لاهله .. ده واخد الموضوع هوايه .. لا وايه ده ساب البنت دي عشان حب واحدة تانيه
 

ولا تعليــــــــــــــــــــــــق

المواقف كتير والاحداث كتير ولو افتكرت مواقف ممكن اكتبها في فصول تانيه بس الاهم من ده كله ان احنا نتعلم ونعرف كويس ان زي ما بيقولوا مش اي حاجة بتلمع تبقا دهب

مش اي حد يقولك بحبك تصدقه .. لازم نتأكد لان الحب مش كلام .. الحب افعااال .. ألافعال بتحدد الشخص ده بيحبك ولا لأ

الحب مش سهر وتفكير و وورد يتجاب ولا هديه في الفلانتين ولا فسحه حلوة يبقا ده بيحبني اوووي

الحب اهتمام وانه حد يخاف على التاني .. الحب انكوا تحسوا انكوا مسئولين من بعض وعن بعض
الحب انك متشوفش حد غيره .. انك مش تشوفه مفهوش عيوب لا بيبقا فيه عيوب .. بس العيوب دي الغريبه انك متأقلم معاها ومش مضايقاك
الحب مش احساس من القلب .. الحب تفكير من العقل .. هل الشخص اللي بنحبه ينفع يبقا زوج و اب لاولادي .. مش انه يكون مستواه الاجتماعي كويس عشان ساعتها يبقا اب كويس لا .. انه يكون انسان اقدر اعيش معاه العمر كله .. انسان انا بحبه بجد وهو بيحبني بجد

ده الاهم من كل شئ

وعارفه انه كان فصل بارد وممل على قلبكم بس اهو يمكن يحصل موقف من المواقف دي مع حد اهو يكون واخد باله واستفاد ويتأكد من حبه وحب الانسان اللي معاه

الفصل الخامس

الفصل اللي فات اكلمت عن حكم الناس على بعض بالشكل .. طب انا بقا عايزة ف الفصل ده اشرح للناس اللي مش بتقرا الكتاب ده ليه انا كتبته

اولا بالنسبه لموضوع السن ان واحدة مراهقه في سني تكتب كتاب .. هما يعني اللي في سني مينفعش يكتبوا غير ايميلات غراميه عشان زمن الجوابات انتهى او اس ام اس نكت لاصحابهم او اذا زااد بهم التطور والشجن يكتبوا عرفي؟!!!!!! .. اه انا بكتب كتاب بطلع في كل مشاعري واحاسيس .. مش احسن ما اني انتحر

طب حد يقولي اعمل ايه .. لما انتحر يقولولي ايه الهبل ده انتي مش تكبري شوية ايه شغل العيال ده 

ولما اجي الف كتاب اكلم فيه عن اي حاجة وعن احاسيسي ومش احاسيسي بس دي ممكن تكون مشكله جيل او اجيال بحالها

محدش يعبرني .. وليه محدش بيعبرني

كل اللي هيقروا مثلا اني ألفت كتاب هيقول عيله في سن المراهقه بتألف  .. ودي  يعني هتكتب عن  ايه

عن السياسة والاقتصاد .. اكيد كلام تافه

 

ومحدش حتى هيفكر يدوس ويشوف انا برغي في ايه

 

وفي اللي هيكسل ويقول لسه هقرا كل الكلااام ده يا عم فكك من الحوارات دي دماغك

بس انا بكتب عشان اطلع اللي جوايا .. حاجات كتير ومشاكل كتير اكبر من سن اي حد عشتها 

انا شوفت بلااااوووي في الزمن ده

بس ايه المشكله ف اني اكلم او احكي اللي جوايا؟؟ .. مش احسن من اني انحرف؟

هل عشان انا في مصر يبقا لازم تفكيري يبقا زي تفكير اي بنت في سني

عن الدروس والمذاكره او تامر حسني و عمرو دياب و الميك اب والممثلين والممثلات

اوك اه انا بعمل كده .. واه بهييس مع صحاابي وبخرج وبتفسح وبرسم على وشي ابتسامه وساعات برسم على وش انسان مضايق ابتسامه وده شئ بيسعدني

بس الجرح اللي جوايا من الزمن اقوى بكتير من اي حاجة

الجرح ده مش عشان قصة حب فشلت .. ما نص البلد قصص حب فاشلة

بس عشان الظلم و القهر و الالم والاهانه بدون سبب .. والوحدة وان اقرب الناس ليك يجرحك ويظلمك

كفايه احساس انك بتبقا عارف ان ممكن يجي عليك يوم تلاقي نفسك مالكش حد او مرمي في الشارع

انك تعيش خايف من ان ده يحصل احساس صعب اوي

يمكن يكون حواليك كتير .. بس هما ليهم حياتهم ومش هيبقوا معاك دايما

وانت صعب تطلب من حد يفضل معاك دايما

طب ده حتى حصلت ثورة المفروض بقا يهتموا بالشباب 

وطبعا هما مهتمين بس مهتمين بالفيس بوك ..الحكومة احتلت الفيس بوك بصراحة

وعلى فكرة انا اقدر اكلم عن السياسة والاقتصاد ..بس ليه اكلم في حاجة في ناس احسن مني فيها يقدروا يكلموا

يمكن انا مش كاتبه كويسة بس كل الحكايه اني بكتب وجهة نظري وحاجات بحس بيها بس

ليه دايما بناخد بالظواهر

يعني ابقا وحشة وعيله ومراهقه تافهه كمان!!!!! .. ايه كل ده

انا انسانه حساسه .. ربنا اداني قدرات وصحه وعقل ليه مستغلوش

الحياة مش هتقف على حاجة .. اعمل اللي انت عاوزه في حدود المسموح والصح واللي يرضي ربنا

اما كلام الناس لا بيقدم ولا بيأخر

لا بيجوع ولا بيشبع ولا بيعمل اي حاجة .. بالعكس عشان ترضي الناس هتتعب ومش هترضي نفسك

 

ويا بخته اللي بيرضي نفسه وفاهم نفسه

الفصل الرابع

هو ده يعني كان ذنبي ولا انا اللي اختارت كده .. دي ارادة ربنا .. ربنا هو اللي عايز كده وهو اللي خلقني كده

خلقني مش حلوة 

في ناس بتشوفني حلوة وفي ناس كتيــــــــــــــــــــــــــــــــــــــــــــر بتشوفني مش حلوة خااااااااالص ليه بقا؟؟ .. عشان انا سمرة .. ربنا خلقني كده مش حلوة اعمل ايه

بس مش معنى كده ان حد يجرحني او حد يسيبني عشان شكلي او ان حد يحكم عليا من شكلي

على فكره انا كنت هنتحر للمرة الرابعه بسبب حد جرحني باني وحشه .. بس رجعت في كلامي

لانه انسان غبي انا مش هعترض على حكم ربنا عشان حد .. وانا انسانه ليا شخصيه وليا كيان واحساس وقلب

ومش غرور بس انا عندي قلب وطيبة مش عند حد .. والا مكنش جرا اللي جرالي في حياتي

ليه بنبني حياتنا على اراء ناس و مين اللي قال الناس تعرف عني اكتر مني والناس تقدر تحكم عليا صح وهما اللي يقدروا يقولوا انا طيب ولا شرير و لا ايه

الناس دي مش صادقه 100% .. الناس دي زيهم زيك بالظبط مفيش فرق

حلوة اوي الحماسه اللي انا فيها والتفاؤل بس على فكره .. ممكن الفصل الجاي تلاقوا شحنه تشاؤم صعب حد يتحكم فيها

عادي مريضة نفسيا بقا :D

المهم حاول تعرف انك عاوز ايه

عارفين .. انا لحد دلوقتي مش عارفه بجد انا عايزة ادخل كلية ايه .. بس نفسي ادخل كليه لحاجة انا بحبها

بس انا بحب الكتابه

بس نادرا لما الاقي حد يشجعني عليها كنت في الاول بكتب خواطر وشعر كان بيعجب الناس وتطور الموضوع لكتب اهو بس الكتاب ده والكلام ده مش هيحسه غير ناس معينه

الناس اللي تايهين في الدنيا زي حالاتي .. حساسين .. اقل كلمه وحشه تجرحهم .. واقل كلمه حلوة تفرحهم

جربت ابقا ايمو .. بس فشلت مرتاحتش معاهم بصراحة مع انهم كاشخاص حبيتهم بس اقصد ايمو مصر

بس بقيت بلاك ويدوو في فترة من حياتي ناس كده زي الايمو .. بس رجعت عن الفكره دي

ساعات بحس اني مش عارفه انا مين؟!!!! .. انا اتجننت يا ناس .. طب وايه يعني

ما انا كده كده مجنونة

عمرك شوفت حد رحب بفكره انه مريض نفسي اوي مش عارفه ليه .. بس عجباني الحكايه دي .. او مصدقاها

نفسي حد يعالجني فعلا

الموضوع بيتطور يا جماعه يوم عن يوم .. بس بحس ان الحاله دي مش انا اللي لوحدي فيها

انا بحب انام عشان حاجتين ابكي او احلم .. حلم يقظه ..  بنيت مدينه في حلمي ده .. و عاش فيها ناس .. طيبين وفي اشرار بس دايما بنتصر عليهم

طبعا عكس الواقع نوعا ما .. بس برضو الحق بينتصر بس مش دايما

وشوفت هناك فارس احلامي .. رجل مثالي في وجهة نظري .. بيحبني بجنوووون وانا كمان بحبه

كفايه جنان عشان مش تخافوا مني :D

خلاصة الكلام ان مش عيب تكون مجنون او وحش او عندك عيب خلقي او حتى انسان ذكاءك محدود او اي حاجة

العيب انك تكون انسان مش كويس

العيب ان الناس تحكم عليك وتكرهك عشان الحاجات دي

.. اصرخ في وش الناس دي وقولهم

انا كده انا سبرايت  :D

شوية ألش يا جماعه عادي يفكوا الكآبه دي

لا بجد ابتسم في وشهم دايما وارفع راسك لفوق وقولهم  .. يمكن انا زي ما بتقولوا عليا مجنون او وحش او كذا

بس الاهم انا عندي قلب وضمير واحساس لو حد فيكوا مكاني هيكون شعوره ايه لما يحصل فيه زي ما بتعملوا فيا

و سامحهم .. ده ربنا غفور رحيم

ازاي احنا منسامحش :)

ربنا يسامحهم

الفصل الثالث

عمرك حسيت انك مجروح مع ان محدش جرحك ؟؟؟ .. عمرك حسيت انك نفسك تبكي او صعبان عليك نفسك؟؟ 

تقعد مع نفسك تفكر .. في ناس بتحب موسيقى تصويريه مع اغاني حزينه .. ممكن نبكي شوية و نروح ننام ونحلم احلام مالهاش معنى .. او احلام ليها معنى مش مهم .. المهم اننا نحلم .. بس احيانا بنعيش جوا احلامنا ومش بنعرف نطلع منها 

امسك ورقة وقلم وطلع كل احساسك فيها حتى لو شخبطه طلع كل اللي جواك .. يمكن ترتاح

بس ليه بنحس ان مشاكلنا بتروح لما نلاقي حد نحبه يبقا معانا .. هل ده معناه عدم ثقة بالنفس واننا محتاجين غيرنا دايما؟؟

ولا يمكن المراهقين بس اللي بيحسوا الاحساس ده .. او يمكن المرضى النفسيين زي حالاتي هما اللي كده بس

انا بحس اني مريضة نفسيا او مش بحس .. انا واثقة من كده

بس مش حاجة حلوة ان مريضة نفسيا تكتب كتاب .. كتاب محدش هيقراه او مين يعرف يمكن حد يقراه ويستفيد منه

انا بسمي اللي بعمله ده شخبطة انسانيه .. تعبير لا شعوري عن اللي بيحصل في حياتي

بس ساعات بحس اني الوحيدة من نوعي اللي بيحصل كل المشاكل والحاجات الغبيه دي وبحس احيانا اني الوحيدة اللي جالها كل مشاكل الناس في حياتها مرة واحدة

الحياة دي وحشة اوي محدش يفتكر انها حلوة محدش يتغر بالحاجات اللي فيها لانها كلها دهب من برا ومن جواها صفيح

بس حرام برضو فيها حاجات حلوة والحاجات الحلوة دي هي اللي بتخلينا نعرف نعيش .. هي حتت الالماس اللي بنلاقيها بالصدفة جوا الصفيح

اول فصل اكتبه وانا ببكي - حبه استعطاف وشجن بقا وكده - .. انا عارفه ان ناس كتير هيتهموني اني كئيبة

بس دي مش انا خالص انا مش كئيبة خاالص .. لست هذا الشخص ابدااااا 

اي حد بيعاني من اي مشكلة معذباه مهما كانت صغيره .. احب اقوله متيأسش زي حضرتي خااااااااالص .. هتتعب اوي

ولو يأست مرة او اتنين ده مش معناه ضعف منك .. و اوعا تسمح لحد يتهمك بالضعف وخليك دايما راسك مرفوعه لفوق مش غرور بس ثقة في نفسك وفي ربنا انه واقف جمبك وانك مش ضعيف واد كل حاجة

متستغربش من اي حاجة في الدنيا ممكن تقابلك .. انا شوفت ناس من كل الاشكال والالوان عشان كده بقت اي حاجة مش بتفاجئني .. ولما اقرب الناس ليك من دمك يغدر بيك .. صعب تتفاجئ من غدر اي حد تاني

يبقا هبل لو اتفاجئت

اغرب احساس انك تحس ان في حد جرحك وانت مش عارف هو مين يمكن من كترهم او يمكن لانك مش عارف وحاسس انك مجروح وخلاص

والاغرب انك تفتقد احساس معين او شخص انت متعرفهوش يمكن شوفته او يمكن مستنيه وحاسس ان علاجك معاه

يمكن معرفش انا مريضة بايه .. اكتئاب او شيزوفرنيا او اي بطيخ ميهمنيش

بس مرضي اللي معرفوش ده  بقيت احس انه ادمان مش قادرة اتخلص منه واتعودت عليه

الموضوع بقا غير عقلاني بالمرة

ربنا يستر

الفصل الثاني

هو الفصل اللي فات و ده فيهم رغي كتير اوي كده ليه ايه الرغي ده كله .. بس عارفين انا بقا اكتر بنت يعني احتمال يكون اتقالها بحبك من ولاد كتير .. وده مش عشان جمال ولا اني غنيه او او مركز او اي شئ يعني
 لا لا لا لا

هما في منهم كان عاوز يتسلى وفي اللي كان حبني بس مكانش عندوا انتماء

اكيد يعني مقصدش انتماء وطني .. لاننا كلنا حسناه الايام دي انا اقصد الانتماء في الحب 

هممممممممممممم والله شكلكوا مش فاهمني طب اما هشرحلكوا

طبعا كلنا او معظمنا عارف سلسلة الافلام الشهيره الرومانسية

The Twilight Saga

انا من محبي الفيلم ده .. واكتر حاجة عجبتني فيه ان البطلة " بيلا " كانت وجهة نظرها عن الحب انه انتماء

وانا اراهن ان محدش فاهم معنى الانتماء في الحب يعني ايه

طب خلونا نبدأ من الاول

ليه الولد بيحب البنت الايام دي؟؟ .. او ليه الناس بتحب دلوقتي؟
 

يا اما عشان حلوة - او عشان اغراض دنيئة ففي دماغه - او عشان اعجب بيها وحبها

 واللي حبوا بجد دول نوعين:/

النوع الاول :/
 نوع اهو حب عشان يحب وخلاص وفي الاخر يتصدم بارض الواقع ويجي يقولها انا لسه مش لاقي الصفر اللي هبدأ منه حياتي ومش عايز اوقف حياتك .. أو يتعب في نص الطريق من الحب ويتخنق منها

 اما النوع التاني:/
 دول القلة القليلة اللي بتحب بجد ..  وياما القدر يفرق ما بينهم ..  او بيجوزوا بعض
 واللي اجوزوا دول
 نوع بيكمل في الجواز .. ونوع بيطلق عشان اتفاجئ بمسئولية زيادة عليه بسرعه

 واتحداك لو قولتلي ان ده مش الحب الايام دي

 بس مفيش انتماء!!

هتلاقي يعني ناس نااادرة ندرة المية في الصحرا بتحس بالانتماء ده
 الحب عندهم يديهم احساس بانه حياة جديدة صعب يرفضها
 زي اختيار قرار الادمان بس ده بيكون ادمان من نوع كويس
 هو الحب اللي بيدخل فيه العقل كمان
 هو ده حب العقل والقلب
ومش اقصد انه استغلال فرصة
بمعنى ان البنت بتشوف عيش جاهز تريح دماغها وتقول انا حكمت قلبي وعقلي واختارت
الانتماء انه يكون المستقبل عايزه مع حبيبك ده مش اقصد فرصة او استغلال انه غني لالا ممكن يكون انسان بيبتدي حياته
بس البنت تحس انها عايزة تكافح وتبني ذاتها
 بتحس انها بتنتمي للعالم المكافح بتاعه
 في ناس بيحبوا بعض وبتستنا حبيبها بس عشان بتحبه بس
 مش عشان عندها طموح زيه
 او عايزة تكافح
 ودول بقوا كتيييير
 وعلى فكره احساس الراجل ان حبيبته واقفة جمبه وبتكافح زيه وانها طموحه زيه
 بيخليه فرحان اكتر من كلمه بحبك على فكره

وده اللي كانت حساه بطله الفيلم .. بالرغم من ان كان عندها " جايكوب " وكان بيحبها وهي حاسه بشعور حب ناحيته .. مع ذلك اختارت " ادوارد " عشان بالرغم ان عالمه غير مثالي وملئ بالمتاعب بس حست انها تنتمي اليه

الفصل الاول

احساس جميل اوي انك تكون عارف كل انواع الناس او بمعنى اصح مريت على كل انواع الشخصيات في اي مجتمع

السياسي .. والحرامي .. واللي بيضرب حشيش ومخدرات .. وبنات مش تمام .. واللي بيشرب خمره .. والعصامي والطموح .. والمجنون المغامر .. والفقير و الغني .. الطيب والشرير .. اللي مش عارف نفسه ومحبط ووحيد

مين فينا يعني مش محبط.. بس حد فعلا جرب الاكتئاب المرضي

احساس انك نص ميت ليس لديك قدرة على الكلام ولا حتى انك تبكي

انا جربت الاحساس ده اكتر من مرة .. انا حاولت الانتحار اكتر من مرة

ايه اللي كان ممكن يحصل لو كان الانتحار مش حرام .. كان كام واحد ممكن يخلص من حياته لاي سبب من الاسباب

ايه الفرق بين الموت والوحدة .. ساعات بحس ان الاتنين واحد او جزء لا يتجزأ من التاني ..

الموت بتكون فيه لوحدك ..  و الوحدة بتكون فيها بتموت

ليس كل ما يتمناه المرء يدركه! .. الدنيا دي غريبه اوي

مجنونة

زي الحب .. الحب كمان مجنون وجزء من الحياه .. مش شرط حب الحبيب لحبيبه .. حب نفسك

حب اهلك .. حب اصحابك .. واكيد حب ربنا .. وحب الوطن كمان

ما هو لما تحب كل دول .. وهما كمان يحبوك .. عمرك ما تحس بالوحدة

بس انا في نظري الحب هو شعور بالامان .. ممكن تكون مش عايز تحب بس بتحب .. لمجرد الحب

بتكون مش مهتم باللي هو المفروض حبيبك بس عايزة جمبك .. تسمع الكلام اللي بيقولوا ليك .. يطمنك

يحسسك انه بيخاف عليك .. وجودك عنده مهم جدا

يحبك اكتر من نفسه

ده اللي احنا عاوزينه .. بس اكيد لو لاقينا حد فيه كل ده .. هنحبه

احنا مجرد ما نلاقي حد فيه حاجة واحدة من دول بنحبه

نرجع لشعور الوحدة ..

هو ممكن يكون حد جرب ينتحر بس خايف يعمل كده تاني؟ .. احساسه زي ما تكون ان دي هي اول مرة مش التانيه

و ده راجع لان ربما الاولى كانت في لحظة عدم ادراك او وعي .. لمجرد صدمة اخدها في حياته

اكيد كلنا اخدنا صدمات كتيره .. بس اسوأ صدمة لما تنخدع ناس بتحبهم

ناس من دمك .. او صحابك .. حبيبك

والاسوأ لو كل دول اكيد

الموت اسهل مما اي حد يتخيل .. سهل جدا تنهي حياتك

الاصعب انك وانت عايش تحس انه منتهية لوحدها وانك عاوز ترجعها

الاصعب لو اتكلمت واللي منك مش بيسمعك .. ويسمعك حد تاني غريب عنك

بس يبقا كويس ان في حد سمعك .. في ناس محدش بيسمعهم اصلا

في ناس عشان تتخلص من الوحدة بتحبس نفسها جوا احلامها

زي فيلم اسف ع الازعاج كده .. تتخيل ناس .. تكلمهم تعيش حياتك وكأنهم فيها

تكون قربت تجنن

ممكن تكون الوحدة هي السبب في ان الانسان يكون عاوز يحب؟

ولا عدم الاحساس بالامان؟

ولا انه محتاج للحنان؟

ولا كل دول مع بعض؟؟؟؟؟

الوحدة هي حلم غريق ع الارض

احساس بيقتل بجد

بس لازم مهما حصل .. يكون عندنا ثقة وايمان بالله

لاننا مالناش غير ربنا

- دنيا في الدنيا - مقدمة

اولا السلام عليكم

ازيكم عاملين ايه .. احب اعرفكم بيا انا الكاتبه اللي هكتب الكتاب ده اللي محدش هيقراه

بس صدقوني ده كتاب مشوق وغير اي قصص او كتب تعرفوها .. هتضحكوا كتير وهتعيطوا كتير

عادي يعني .. خليكوا واثقين فيا

الحكاية يمكن فيها حقيقه ويمكن يدخل فيها بعض الخيال

بس دي مش بس داخل فيها قصة انسانه لا دي قصة فئات متعددة من الناس في كل الاحوال

لان كل انسان له دنيا جوا الدنيا

سلاااااااام